--------------------------------------------------------------------------------
هذه قصة واقعيه دون اضافات ولا بهارات
لأنها مش بحاجة اضافات او غيره
واقسم على ذلك حيث انها حصلت في احدى مدارس الطفيله والتي تعمل بها اختي
وهذه هي القصة كما تحدثت بها اختي
ومجموعه من المعلمات عندنا في البيت وعلى مسمع مني
في احد الايام وبعد ان تفضلت وزارة التربيه والتعليم بأدخال الكمبيوتر بشكل اوسع الى المدارس فأن هذه المدرسه كانت من ضمنها اسوة بالبقية ولكن المختلف في الموضوع انه بعد عدة ايام من استلام هذه الاجهزة وتركيبها بالمدرسة
توجهت احدى المعلمات )دون ذكر اسماء) الى المديرة تشتكي لها وتقول:
ايش يا مس....... هدول التربيه ضحكو علينا واعطونا اجهزه قديمه من مدارس ثانيه
وهيها ما الها يومين وبلشت تتعطل !!!!
المديرة: كيف تعطلت شو مالها ؟ مستحيل الحكي هاظا بجوز الطلاب لعبو فيه وخربوه؟؟؟
المعلمه: لا لا والله ما حدا لمسو غيري اصلا انا ما بسمح لحدا يمرق من جنبو
المديره: انت متأكده من هالحكي.. يا بنت حرام نظلم الناس وبعدين هذه وزاره مش لعبه
يعني نتهمها زور وبهتان !!!!!
المعلمه: بقولك علي الطلاق من جوزي ما حدا لعب فيه او قرب منو غيري ومش عارفه شو صارلو
هالمسخوط . والله كان شغال زي العسل واليوم فجأه تعطل, لا يروح صابتو عين مس فلانة
هذه عينها بتفلق الحجر, او صابو جراثيم (قصدها فايروسات) بتعرفي المنطقه عندنا غبره وكلها
امراض عشان احنا قريبين من مصنع الاسمنت.
لا مستحيل طول عمرنا هون وما حدا شكى من شي. على كل حال هسع بحكي مع التربيه بخليهم يبعثو فني عشان يصلحو بسيطه عادي بتصير في احسن المدارس.
بالفعل حكت المديره مع التربيه وقالولها بكره الصبح بيجي الفني وبصلحو.
ثاني يوم صبح الفني جاي (طبعا لانها مدرسة بنات مسبل هالشعرات وجاي يعرط قدام المعلمات)
الفني:صباح الخير انا فلان فني كمبيوتر
المديرة: صباح النور شرفتنا .تشرب شاي ولا قهوه؟
الفني :لا شكرا خليها بعد ما اشوف العطل واصلحو بعدين بنقعد بنتقهوا وبنسولف
.
المديره: على بركة الله...يا ام .......(الاذنه) نادي المعلمه اللي كمبيوترها خربان بسرعه.
دقيقه والا المعلمه جايه.
المديره: روحي مع الفني وخليه يشوف جهازك عشان يصلحو وبس يخلص تعالو لعندي
عشان نعمل تقرير
.
وزي الطلق راحت المعلمه مع الفني وهناك دار الحوار التالي:-
الفني: هذا الجهاز الك انت ؟
المعلمه: طبعا الي انا لاني اشطر وحده هون وما بنادوني غير يا كمبيوترجيه
الفني:ماشاءالله..طيب في ناس بستخدمو غيرك انت ؟؟؟؟
المعلمه: لالالا هذا الشي المستحيل ابدا.
الفني:لعاد اشرحيلي شو صار معك بالضبط من طقطق للسلام عليكم.
المعلمه: والله يا استاذ بكل بساطه انا كل يوم باجي الصبح بعمل شاي لحالي وبصبو في المج(فنجان كبير لشرب الشاي والقهوه) تبعي هاظا وبقعد على هالكمبيوتر وببلش اخبص لحالي ساعة لانو ما عندي حصه اولى وبعدين بسكرو وبروح على حصتي.
الفني : وبعدين ؟؟؟؟؟؟
المعلمه: ولا قبلين, لما اجي كل يوم متعود احط فنجاني على قاعدة المج الخاصة واشرب وانا بشتغل, واليوم اجيت بدي احط فنجاني عليها ما زبط معي , وهذه هي المشكله بس.
الفني : وانا عدم المؤاخذه شو دخلني بالمج وقاعدتو انا , انا فني كمبيوتر.
المعلمه: ما انا عارفه انك فني وسيد الفنيين وانا اسفه كثير انا قصدي انو قاعدة المج تبعت الكمبيوتر المعطله.
الفني:ليش هو الكمبيوتر الو مج كمان ؟؟؟؟؟؟؟؟؟!!!!!!
المعلمه: الله يجازي بلايشك ضحكتني. لا مالو مج قصدي القاعده اللي بالكمبيوتر المخصصه للمج تبعي انا.
الفني: يا اختي اي قاعده واي مج انت شو قصتك فهميني.
المعلمه: يا زلمه القاعده القاعده العاديه هاي هاااااااااي شو مالك انت غشيم بالصنعه.
الفني : هاي قاعدة المج قصدك ؟؟؟؟؟
المعلمه: اه هاي , اسم الله عليك
الفني : ,,, ولك هاي قاعدة مج هاي ولك يا معلمه يا مربية اجيال هذا المكان اللي بتفتحيه عشان تحطي السي دي يا طافية.
ولا تقوليلي انك كمان ما بتعرفي السي دي
_________________